Një nga zjarret më të rënda të viteve të fundit në Spanjë ka shkaktuar të paktën 12 viktima, ndërsa 23 persona rezultojnë të zhdukur në rajonin e Almerías, në juglindje të vendit. Autoritetet spanjolle bëjnë me dije se mes viktimave ndodhen katër shtetas britanikë, ndërsa numri i të vdekurve pritet të rritet.
Qindra zjarrfikës dhe ekipe të emergjencës vijojnë operacionet për shuarjen e flakëve dhe kërkimin e të zhdukurve në zonën e Bedarit dhe Los Gallardos, ku zjarri u përhap me shpejtësi për shkak të temperaturave që arritën rreth 40 gradë Celsius, tokës së tharë dhe erërave të forta.
Autoritetet po hetojnë shkaqet e zjarrit. Dyshimet fillestare u përqendruan te një linjë elektrike e rrëzuar, por kompanitë e energjisë elektrike kanë mohuar që kjo të ketë qenë shkaku.
Ministri i Shëndetësisë dhe Emergjencave i Andaluzisë, Antonio Sanz, deklaroi se shumica e viktimave mund të jenë shtetas të huaj. Ndërkohë, Ministria e Jashtme e Britanisë së Madhe dhe autoritetet spanjolle nuk kanë bërë ende publike identitetet e viktimave.
Banorët dhe turistët përshkruajnë skena dramatike gjatë evakuimit. Një turiste britanike tha për BBC se tymi dukej “si një re në formë kërpudhe, sikur të kishte shpërthyer një bombë”, ndërsa shtoi se disa persona mund të mos kenë arritur të largohen në kohë nga zona e rrezikut.
Shërbimi meteorologjik spanjoll parashikon përmirësim të kushteve atmosferike gjatë ditës së shtunë, me temperatura më të ulëta dhe erë më të moderuar, çka pritet të ndihmojë në përpjekjet për vënien nën kontroll të flakëve.
Ky është tashmë një nga zjarret më vdekjeprurëse në historinë e Spanjës. Ekspertët theksojnë se ndryshimet klimatike po favorizojnë valë më intensive të të nxehtit dhe zjarre gjithnjë e më shkatërruese në Evropën Jugore.
