Korporata Elektroenergjetike Shqiptare bëri të ditur se prodhimi ditor në tre HEC-et e kaskadës së Drinit është 24 mijë MWh, duke u rritur në krahasim me ditën e premte, që ishte rreth 16 mijë, ndërkohë që vijojnë shkarkimet nga HEC-et e Komanit dhe Vaut të Dejës.
Sipas KESH-it, prurjet natyrore janë reduktuar në HEC-in e Fierzës, duke arritur 1 mijë e 200 m³/s, po ashtu edhe në HEC-in e Komanit janë ulur në 350 m³/s, ndërsa në HEC-in e Vaut të Dejës ka një rritje të lehtë, duke arritur në 100 m³/s.
Sipas të dhënave të Korporatës Elektroenergjetike Shqiptare, në 24 orët e fundit ka ndryshuar niveli i liqeneve në kaskadën e Drinit.
Rritje të nivelit me gati 1 metër, në krahasim me një ditë më parë, është shënuar vetëm në HEC-in Fierzë, 290.8 mmnd. Por kuota në liqenin e Fierzës është brenda normës.
Ndërsa në Koman, niveli këtë të shtunë është reduktuar me mbi 1 metër, duke arritur në 172 mmnd, ndërkohë në Vaun e Dejës nuk ka ndryshim të nivelit, duke mbetur 74.5 mmnd.
Ndaj edhe shkarkimet në HEC-in e Vaut të Dejës vijojnë të jenë në të njëjtin nivel me ditën e premte, 700 m³/sekondë, ndërsa në Koman shkarkimet janë ulur, nga 700 m³/s që ishin të premten, në vetëm 300 m³/s.
