Lulzim Basha ka reaguar sërish ndaj Ramës duke thënë se e pranoi që maskat janë të skaduara.
Në një postim në Twitter, Basha i thotë që të sigurojë jetën e qytetarëve pasi nuk jemi në luftë por në situatë emergjence.
“Më në fund e pranoi të vërtetën. Maskat janë të skaduara. Si të tilla ato nuk mund të jenë masë mbrojtëse për personelin mjekësor. Edi Rama mblidh mendjen dhe siguro jetën e qytetarëve! Lëri lojrat e fjalëve dhe fokusohu tek problemi kryesor që kanë sot shqiptarët. Nuk jemi në luftë, jemi në situatë emergjence që kërkon seriozitet dhe përgjegjshmëri. Dhe jo shfaqje me maska të skaduara mbi fytyra të skaduara”, shkroi Basha.
Por i menjëhershëm ka qenë reagimi i Edi Ramës në Twitter. Shefi i qeverisë shkruan se Shqipërisë në këtë situatë i duhet kursyer avazi politik.
“Nëse ty s’të duket luftë kjo e njeriut me virusin e panjohur, quaje gjendje e jashtëzakonshme a si të duash! Po vare të paktën atë fyell në mur e kurseja Shqipërisë avazin politik, se s’është koha për politikë kjo, po ora për t’i shërbyer popullit me forcën e shembullit njerëzor! Ndërroje maskën dhe orën, se kjo është një orë e rëndë për Shqipërinë dhe nuk je as ti, as partia jote halli i këtij populli sot, e s’ta ka borxh askush të të shpjegojë tre herë në ditë që s’është gabim, po është faj në mos krim të nxisësh panik me të pavërteta!” – thotë Rama mbrëmjen e së martës.
/a.r
