Kuvendi po vijon punimet me diskutimin e projektligjit “Për vetëqeverisjen vendore”, që sanksionon organizimin dhe funksionimin e pushtetit vendor në kuadër të reformës së re administrativo-territoriale, si dhe reformës së decentralizimit.
Disa nga risitë që sjell projektligji është se për herë të parë sanksionohet “kufizimi i mandatit” për kryetarët e bashkive në vetëm tri mandate radhazi. Tjetër risi lidhet me ndryshimin e emërtimit nga “qeverisje vendore” në “vetëqeverisje vendore”. Pr/ligji vendos një raport të qartë normativ në marrëdhëniet mes qeverisjes qendrore dhe vetëqeverisjes vendore.
Ligji i ri njeh të drejtën e “iniciativës qytetare” për të propozuar projekt-akte të caktuara për vendimmarrje nga këshillat bashkiakë. Ai gjithashtu sanksionon detyrimin që funksionet i njihen qeverisjes vendore vetëm nëpërmjet ligjit, duke mbyllur praktikën e deritanishme të ndryshimit të funksioneve e të kompetencave me akte nënligjore.
Shtohen funksione të reja në kuadrin e thellimit të decentralizimit e të politikave të reja në këtë fushë si p.sh. bujqësia, funksioni i ujitjes dhe kullimit, shërbimit të zjarrfikësve, shërbimeve sociale lokale, pyjeve dhe kullotave etj.
