Vidhet skulptura e punuar nga Rodeni, ende nuk ka të arrestuar
Policia në Danimarkë është në ndjekje të dy hajdutëve që vodhën një skulpturë të vogël të skulptorit francez, Auguste Rodin. Skulptura është vjedhur nga një muze në Kopengahë, në mes të ditës, transmeton Gazeta Blic. Vjedhja ka ndodhur në muajin korrik, por kohëve të fundit policia ka lëshuar pamjet e vjedhjes. Vepra artistike është punuar në vitin 1863 dhe është menduar se ka vlerë mbi 300 mijë dollarë. Hetuesi kryesor ka deklaruar se vepra e artit është vjedhur me datën 16 korrik. Policia daneze beson se hajdutët kanë vizituar muzeun një javë para vjedhjes. Tashmë në përndjekje të hajdutëve janë edhe Interpoli dhe Europoli.
