Të paktën 5 persona kanë humbur jetë nga tërmeti i fuqishëm që ka goditur Meksikën ditën e djeshme.
Tërmeti ka shkaktuar panik tek qytetarët në banesa, kjo edhe pasi për shkak të pandemisë shumë prej tyre kanë qenë duke punuar nga shtëpia.
Epiqendra e tërmetit me fuqi prej 7.4 shkallësh Rihter ka qenë në shtetin jugperëndimor Oaksaka.
Gjashtë orë pas tij janë regjistruar edhe mbi 400 dridhje të tjera në rajon.
Tërmeti ndodh më pak se tre vjet pas një tërmeti tjetër të fuqishëm, i cili ka lënë qindra njerëz të vdekur dhe mijëra të pastrehë në Meksiko Siti.
Si pasojë e lëkundjeve shpërthyen flakët në një rafineri në qytetin Salina Cruz, i cili ndodhet në brigjet e oqeanit Paqësor.
Epiqendra e tërmetit është një nga destinacionet kryesore të turizmit në Meksikë, ku plazhet ishin hapur vetëm disa ditë më parë. Ndërkohë autoritetet kanë parlajmëruar një tsunami me një rreze 1000 km, në brigjet e Meksikës, i cili pritet të përfshijë Guatemalan, El Salvadorin dhe Hondurasin.
Mediat vendase raportojnë se si pasojë e tërmetit ka pasur rrëshqitje të mëdha të tokës, janë dëmtuar rrugët lidhëse mes qyteteve, si dhe janë shkaktuar probleme serioze në një spital që trajton të sëmurët me COVID-19.
