“Një katastrofë. I bëj thirrje të gjithë qytetarëve të fotografojnë dëmet e pësuara për kompensimin. Do shpallim gjendjen e krizës dhe të emergjencës”.
Me ujin që i arrin deri në gjunjë, kryebashkiaku i Venecias ecën nëpër qytetin e përmbytur një ditë pas baticës rekord, e cila arriti kulmin me 187 centimetra. “E gjithë kjo është efekti i ndryshimeve klimatike”, deklaron ai.
Venecia zgjohet dhe gjen një tjetër super-baticë, afërsisht 1 metër e 50 cm. Vetë Qendra e baticave është bërë viktima e stuhisë, që ka dëmtuar linjat telefonike, dhe për këtë arsye mund të kontaktohet vetëm përmes rrjeteve sociale.
Venecia mund të mbetet për ditë të tëra “peng” i baticave të larta të të jashtëzakonshme, të parashikuara deri të premten. Dy persona humbën jetën në Pellestrina.
“Kemi para syve një shkatërrim apokaliptik dhe total, por nuk po e ekzagjeroj me fjalët. 80% e qytetit është nën ujë, dëme të paimagjinueshme, të frikshme”. Kështu deklaroi Presidenti i Venetos i Lega-s, Luca Zaia, në një lidhje me Mattino 5.
Disa prej vendeve më të dëmtuara janë qendra e San Markos, një Kolegj Ndërkombëtar në San Servolo, dhe një hotel.
Moti i keq shkaktoi dëme edhe në linjat telefonike. Qendra për parashikime dhe raporte nuk u përgjigjet dot të gjitha thirrjeve të qytetarëve dhe kërkon që të përhapen lajmet në rrjetet sociale dhe me gojë./ Javanews
