Kjo është ajo çfarë ka mbetur nga “qyteti kamp” i 13,000 refugjatëve dhe migrantëve në Moria të Greqisë. Mëngjesi i kësaj të mërkure nxori në dritë shkatërrimin dramatik.
Mediat greke thonë se strukturat akomoduese të administratës dhe infrastruktura e identifikimit nuk ishin djegur, por Shërbimi i Azilit dhe pajisjet e tij ishin djegur plotësisht.
Dëmtime ka edhe në Njësinë e Kujdesit Intensiv dhe në njësinë e kondicionimit të ajrit, e cila u dhurua nga qeveria holandeze.
Një pjesë e madhe e popullsisë së Moria – rreth 12,000 njerëz – ka ikur në zonat përreth, ndërsa një pjesë tjetër është zhvendosur në qytetin e Mytilene, ku në lartësinë e Kara Tepe, pak para fabrikës së PPC, është rreshtuar një forcë e fortë policie që nuk i lejon ata të hyjnë në qytet.
Zjarri shpërtheu rreth orës 00:00 të mesnatës, kur refugjatët dhe migrantët që kishin rezultuar pozitivë për koronavirusin refuzuan të izoloheshin.
Pasuan përleshjet me refugjatët dhe migrantët e tjerë që i shtynë ata jashtë kampit.
Ky konflikt në një moment mori karakter fisnor, duke rezultuar në zjarre, të cilat shpejt, për shkak të erës së fortë, u përshkallëzuan.
Forcat e Brigadës së Zjarrfikësve, që mbërritën në kamp për të vepruar, u sulmuan nga grupe azilkërkuesish që i penguan ata në punën e tyre.
Për momentin, Brigada e Zjarrfikësve po vepron në kamp me përforcimin e mjeteve ajrore, në mënyrë që të shuhet plotësisht zjarri dhe më pas të kontrollohet zona.
CNN ka publikuar edhe pamje nga vendi i ngjarjes, ku emigrantët shihen teksa vrapojnë të tmerruar në rrugë, ndërsa vendi është shkretuar.
