Në ditën e fundit të 2025, Ministrja për Evropën dhe Punët e Jashtme, Elisa Spiropali, ka përcjellë një mesazh urimi për të gjithë shqiptarët anembanë botës për një vit të ri sa më të begatë.
Në një videomesazh ajo ka vlerësuar vitin që po mbyllet si një periudhë sfidash, por edhe arritjesh të rëndësishme për Shqipërinë.
Spiropali theksoi se një nga sukseset më të mëdha të vitit ishte hapja me sukses e të gjithë grupkapitujve të negociatave me Bashkimin Evropian brenda vetëm 13 muajsh. Sipas saj, kjo është një dëshmi e qartë e vendosmërisë së Shqipërisë për t’u integruar në familjen evropiane.
“Shqipëria ecën sot më e vendosur drejt familjes evropiane. Sfida më e madhe vjen tani, ku shpejtësia e hapjes së grupkapitujve duhet të shoqërohet me të njëjtën shpejtësi në zbatimin e reformave,” u shpreh ministrja.
Spiropali theksoi gjithashtu se viti që po mbyllet do të mbahet mend si viti kur u miratua ligji për votën e diasporës, duke e cilësuar këtë një hap të rëndësishëm për përfshirjen e shqiptarëve që jetojnë jashtë vendit në proceset demokratike.
“Viti i ri na gjen në një nivel të paprecedente përgjegjësie, por edhe nivelin më të lartë të ambicieve. 2026 do nisë me pensione e paga më të larta, investime rekord, rritje ekonomike me një trend përshpejtues”, tha ministrja.
Ministrja e Jashtme e mbylli mesazhin me urimin për një vit të ri me më shumë progres dhe përmbushje të objektivave strategjikë të Shqipërisë.
