Kryefjala e ditës së sotme është padyshim lajmi, që klubi i Crvena Zvezdas u kthye mbrapsht nga Policia e Kosovës dhe nuk u lejua të kalonte kufirin.
Klubi serb ishte nisur për të zhvilluar ndeshjen e Kupës ndaj klubit ilegal serb, Trepça, në Zveçan. Së fundmi, është publikuar një video ku shihet drejtori i përgjithshëm i Crvena Zvezdas, Zvezdan Terzic teksa kthehet mbrapa nga një polic i Kosovës.
I pari që tentoi të kalonte kufirin mes Serbisë dhe Kosovës ishte drejtori i përgjithshëm i Crvena Zvezdas, Terzic, por përgjigja që mori ky i fundit ishte negative.
Policia e Kosovës i kërkoi fillimisht dokumentet, ndërsa më pas e njoftoi se e ka të ndaluar hyrjen në Kosovë. Terzic pyeti për arsyen, ndërsa polici iu përgjigj thjeshtë, se ky është urdhër i Qeverisë së Kosovës.
