Një person u arrestua nga Policia e Tiranës ndërsa një tjetër u shpall në kërkim pasi kanë qëlluar me armë në ajër pasi janë përfshirë në konflikt me njëri-tjetrin për një vend parkimi. Ngjarja ka ndodhur gjatë ditës së djeshme rreth orës 20:00, në Rrugën “Mujo Ulqinaku”. Policia ka sekuestruar në vendngjarje dy gëzhoja të kalibrit 7.62 mm TT.
Nga hetimet e kryera është arritur të mësohet se konflikti ka ndodhur midis tre personave dhe arsye e këtij konflikti ka qenë një vend parkimi. Falë punës operative-hetimore dhe procedurale të kryer është bërë i mundur identifikimi i personave të përfshirë në këtë konflikt dhe më pas arrestimi i Ardit Isufaj, i njohur si “Doraci”, 28 vjeç, banues në Tiranë. Ndërkohë, është bërë shpallja në kërkim e F. Gremi, i njohur si “Lori”, 36 vjeç, banues në Tiranë.
Gjithashtu, është proceduar penalisht, M. P., 68 vjeç, banues në Tiranë (Neni 300). M. P, ka parkuar automjetin e tij në afërsi të shkallës së pallatit ku banon F. Gremi, ku ky i fundit është afruar dhe ka filluar të debatojë me M.P, më pas është afruar edhe Ardit Isufaj. Pas debatit Isufaj dhe F. Gremi kanë kanosur M. P dhe kanë qëlluar me armë zjarri në ajër, e më pas janë larguar me shpejtësi nga vendparkimi. /ma.me
