Kombëtarja nuk do të jetë vetëm në transfertën e mbrëmjes së sotme me Skocinë. Kuqezinjtë e drejtuar nga Christian Panucci do të ndiejnë mbështetjen dhe entuziasmin e tifozëve shqiptarë, që kanë udhëtuar nga Shqipëria e Kosova, por nuk mungojnë edhe emigrantët tanë në Angli e vende përreth.
Natyrisht, do të jetë e vështirë për ta të dëgjohen në “vullkanin” e pritshëm të “Hampeden Park”, ku pritet të dominojnë tifozët e zjarrtë skocezë, por ngjyrat kuqezi do të kenë, sidoqoftë, pjesën e tyre në këtë stadium. Pasi janë rikthyer në mbështetje të kombëtares që në fitoren 1-0 ndaj Izraelit, “Tifozët Kuq e Zi” kanë filluar ta ndezin atmosferën në Glasgow disa orë para fillimit të ndeshjes.
Këngët, brohoritjet, tundja e shajeve kuqezi, “tam-tamet” e tupanit janë “menuja” e shpalosur nga tifozët shqiptarë nga mesdita e në vazhdim. Njëri nga udhëheqësit e “TKZ”, që nuk lë stadium të botës pa shkuar, kur luan kombëtarja shqiptare, Ramadan Tërstena, ka hedhur një video në faqen e tij në Facebook, ku tregon më së miri atmosferën para ndeshjes, me ngjyrat kuqezi.
Glasgow, qyteti-port në lumin Clyde, në ultësirën perëndimore të Skocisë, një qendër kombëtare kulturore, duke përfshirë Operën Skoceze, Baletin Skocez dhe Teatrin Kombëtar të Skocisë, si dhe muzetë e mirënjohur, flet edhe shqip ditën e sotme. Urojmë që “shqip” të flasë edhe ballafaqimi i mbrëmjes për Ligën e Kombeve, pas 90 minutave Skoci-Shqipëri!
