Një aksion i Komisariatit të Policisë së Korçës, mbrëmjen e së martës, çoi në arrestimin e një 31-vjeçari që mbante me vete armë zjarri pa leje.
Ai u arrestua brenda një lokali në qytet, ndërsa tentoi të ikte sapo kuptoi që po arrestohej nga efektivët e policisë.
I arrestuari është Andi Qeraxhi, një person me precedentë të mëparshëm penalë. Ai dyshohet se në vitin 2017 qëlloi me kallashnikov drejt një lokali nate në periferi të qytetit të Korçës.
Po ashtu, ai dyshohet se mund të jetë i përfshirë edhe në veprimtari të paligjshme të trafikimit të lëndëve narkotike.
Njoftimi i policisë
“Shërbimet e Komisariatit të Policisë Korçë, bazuar në informacionet e siguruara se një shtetas lëvizte i armatosur, organizuan dhe finalizuan operacionin policor të koduar ‘Target’.
Si rezultat i operacionit, policia ushtruan kontroll në lagjen nr. 9, në një lokal, ku u konstatua shtetasi A.Q., i dyshuar si i armatosur. Sapo pa forcat e policisë, ai tentoi të largohej me shpejtësi për të shmangur arrestimin, por u kap dhe neutralizua. Nga kontrolli fizik, policia gjeti dhe sekuestruar një armë zjarri pistoletë me krehër, municion luftarak dhe një shumë parash.
Në përfundim të veprimeve procedurale, A.Q., 31 vjeç, banues në Korçë, u arrestua në flagrancë për veprën penale ‘Mbajtja pa leje dhe prodhimi i armëve, armëve shpërthyese dhe municionit’. Materialet procedurale iu kaluan Prokurorisë së Korçës për veprime të mëtejshme”, njofton policia.
