Rindërtohet grafikisht skemën e ekzekutimit mafioz të Hekuran Billës. Në duart e policisë janë dhjetëra kamera sigurie, ndërsa për vrasjen e 40-vjeçarit janë ngritur disa pista, mes tyre dhe ajo e hakmarrjes.
Këto janë kamerat e sigurisë që kanë fiksuar momentin e ekzekutimit të Hekuran Billës para një qendre tregtare në zonën e ‘Komunës së Parisit’.
Në vendngjarje kanë mbetur ende disa shenja pas atentatit, i cili u regjistrua në orën 21 e 57 minuta të së enjtes.
Në bazë të pamjeve filmike autorët kanë qenë në ndjekje të BMW X6 të bardhë me të cilën lëvizte viktima dhe sapo ai po ndalonte pranë hyrjes së një qendre tregtare, ata janë afruar dhe nga xhami i pasmë i mjetit të tyre u qëllua me breshëri.
Sipas informacioneve, autorët janë përplasur me një mjet tjetër që iu zuri rrugën dhe janë detyruar të lëvizin mbrapsht, për të ndjekur më pas rrugën drejt Unazës së Madhe, e më tej drejt fshatit Pezë, aty ku dogjën edhe automjetin së bashku me armën automatike të krimit.
Nga breshëritë e plumbave Hekuran Billa mori plagë në kokë dhe në trup, duke ndërruar jetë menjëherë.
Hekuran Billa jetonte në fshatin Domje, ndërsa në zonën e Komunës së Parisit kishte takuar disa miq të tij, por edhe të motrën. Motivet e ekzekutimit janë ende të paqarta, por dyshimi kryesor për hetuesit mbetet hakmarrja për shkak të së kaluarës së tij.
Kohët e fundit 40-vjeçari kishte hapur edhe një biznes të tijin në Tiranë për dhënien e makinave me qira. Policia nuk ka shumë prova apo të dhëna për vrasësit, ndërsa automjeti dhe targat e përdorura në ekzekutimin mafioz kanë rezultuar të vjedhura.
g.kosovari
