Policia ka publikuar një video, ku tregohen momentet e një aksidenti. Drejtuesi i mjetit shkel semaforin duke shkaktuar aksident me një motor.
Nuk njoftoi policinë për aksidentin, u largua nga vendi i aksidentit duke mos i dhënë ndihmë të dëmtuarit.
Po falë telefonatës në kohë dhe regjistrimit të ngjarjes nga kamerat e bordit të një automjeti, Policia Rrugore e kryeqytetit u vu menjëherë në ndjekje të tij.
E ndaluan dhe konstatuan se drejtuesi i automjetit ishte në gjendje të dehur në masën 0.83 mg/l.
Drejtuesi i mjetit A.N., 37-vjeç, u arrestua në kushtet e flagrancës për veprën penale të drejtimit të mjetit në gjendje të dehur si dhe iu pezullua leja e drejtimit për mosdhënie ndihme të të dëmtuarit dhe largim nga vendi i aksidentit.
Policia e Shtetit falenderon qytetarin që dha kontributin e tij në zbardhjen e ngjarjes rrugore duke telefonuar Policinë dhe regjistruar aksidentin rrugor.
Po ashtu apelohet që të telefonohet në numrin 112 për çdo emergjencë 24/7./a.m.
