Policia e Shtetit thotë se ka rritur edhe më shumë prezencën në akset rrugore dhe qendrat e banuara, për të vijuar kontrollet intensive, për parandalimin e aksidenteve rrugore.
Por pavarësisht masave të marra, Policia e Shtetit ngre shqetësimin se “ka akoma shumë drejtues mjetesh që abuzojnë me shpejtësinë dhe alkoolin në timon, kryejnë parakalime të gabuara apo manovra të rrezikshme në rrugë, përdorin aparatin celular gjatë drejtimit të mjetit dhe nuk vendosin rripin e sigurimit, drejtojnë mjetin pa leje drejtimi apo motomjetet pa vendosur kaskën mbrojtëse”.
Ndërkohë, në 24 orët e fundit, në të gjithë vendin janë konstatuar shpejtësi që arrijnë deri në 174 km/h dhe drejtues mjetesh që drejtojnë mjetin nën efektin e alkoolit apo në gjendje të dehur.
Si rezultat, janë arrestuar 7 persona nga të cilët 4 për drejtim mjeti në gjendje të dehur dhe 3 për drejtim mjeti pa leje drejtimi, janë pezulluar 43 leje drejtimi, nga të cilat 29 për shpejtësi deri në dyfish mbi normën e lejuar dhe 14 për drejtim mjeti nën ndikimin e alkoolit, si dhe janë ndëshkuar me masë administrative, 1495 drejtues mjetesh, për shkelje që përbëjnë rrezik për përfshirje në ngjarje rrugore.
Nisur nga fakti i prezencës së lagështirës në rrugë si pasojë e reshjeve te rena oret e fundit, Policia apelon gjithë drejtuesit e automjeteve dhe motomjeteve, që të bëjnë kujdes, “të respektojnë në maksimum rregullat e qarkullimit rrugor, të mos abuzojnë me shpejtësinë, por të qarkullojnë duke respektuar normat e lejuara dhe sinjalistikën rrugore, të mos drejtojnë mjetin nën efektin e alkoolit apo më keq akoma në gjendje të dehur dhe të mos përdorin celularin gjatë drejtimit të mjetit, si dhe të vendosnin rripin e sigurimit dhe kaskën mbrojtëse”./m.j
