Policia ka bërë publike pamjet e kapura teksa 40 vjeçari i shpallur në kërkim, i vë tritolin një lokali në Fushë Krujë. Siç mund ta shihni, ai afrohet me hapa jo shumë të shpejtë. Me fytyrën e mbuluar e kostum sportiv veshur, nuk heziton ‘të përshëndesë’ me dorë nga kamerat. Pasi kryen “misionin”, ikën krejtësisht i pashqetësuar…
Mësohet se ai ka bashkëpunuar me një person tjetër për vendosjen e lëndës plasëse. Ky i fundit është arrestuar nga policia.
“Si rezultat i veprimeve hetimore dhe operacionale të kryera me qëllim zbardhjen dhe dokumentimin e plotë të ngjarjes së ndodhur me datë 31.01.2025, ku u dëmtua me lëndë plasëse, fasada e një lokali në Fushë Krujë, kanë bërë të mundur identifikimin dhe shpalljen në kërkim të autorit të ngjarjes shtetasin M. Z., 40 vjeç si dhe kapjen dhe ndalimin e shtetasit M. T., 41 vjeç, i identifikuar si bashkëpunëtori i shtetasit M. Z. Shtetasi M. Z., dyshohet se ka vendosur lëndën plasëse në lokalin e shtetasit B. T., dhe më pas është larguar nga vendi i ngjarjes me automjetin e shtetasit M. T. Gjatë kontrollit të banesës së shtetasit M. Z., shërbimet e Policisë kanë gjetur e sekuestruar një armë gjahu pa leje, një armë sportive dhe municion. Shërbimet e Policisë po punojnë për kapjen e shtetasit M. Z. Materialet procedurale iu referuan Prokurorisë së Tiranës, për veprime të mëtejshme”, njofton Policia për ngjarjen.
Kujtojmë se rasti u raportua më 31 Janar, ku si pasojë e shpërthimit u dëmtuar plotësisht fasada e jashtme e lokalit në pronësi të Bledar Talit. Pronari i biznesit ka deklaruar se nuk ka konflikte me njeri dhe nuk i di arsyet pse mund të ketë ndodhur ngjarja.
Ndërkohë hetuesit po vijojnë hetimin në disa pista. Ndër to konfliktet e mundshme jashtë shtetit ku ka jetuar dhe punuar vitet e fundit pronari.
