Një ngjarje makabre është regjistruar në Shëngjin pranë një kompleksi turistik, ku dy burra kanë rrahur barbarisht një të ri, duke e goditur me levë hekuri si dhe duke e kërcënuar me armë.
Video e momenteve të rrahjes ç’njerëzore është publikuar nga JetaoshQef. Ngjarja ka ndodhur dy ditë më parë, teksa policia ka shpallur në kërkim autorët. Bëhet fjalë për shtetasit Vilson dhe Arjan Haxhiu, respektivisht 36 dhe 33 vjeç.
“Më datë 02.07.2016, nga Seksioni i hetimit të krimit në Komisariatin e Policisë Kurbin, u referuan materialet në Prokurorinë e Rrethit Gjyqësor Kurbin, u shpallën në kërkim policor dhe punohet për kapjen e shtetasve:
Vilson (Elvin) Haxhiu, 36 vjeç, banues në Kurbin
Arjan (Erjon) Haxhiu, 33 vjeç, banues në Kurbin
Është njoftuar se në Kurbin ka një konflikt. Menjëherë në vendngjarje kanë mbërritur forcat policore që kanë konstatuar se ka ndodhur konflikt për motive të dobëta mes shtetasve Vilson dhe Arjan Haxhiu me shtetasin G.B. 23 vjeç , banues në Kurbin.
Dyshohet se këta 2 shtetas në bashkëpunim me njëri-tjetrin, në kohen që shtetasi G.B. po shkonte në banesë me mjetin e tij, i kanë dalë perpara dhe shtetasi Arjan Haxhiu me një mjet të fortë i ka dëmtuar automjetin duke i thyer xhamat si dhe e ka goditur në kyçin e dores së majtë duke i shkaktuar dëmtime e frakturë kurse shtetasi Vilson Haxhiu e ka kërcënuar me jetë qe të mos lëvizte me një armë zjarri.
Veprat penale në ngarkim të shtetasve ‘Shkatërrim prone’; ‘Kanosje’; ‘Dëmtime të tjera me dashje’”- shkruhet në deklaratën e policisë./java/a.k
