Xhamia ikonike e Et’hem Beut në zemër të Tiranës është konsideruar si një xhevahir i trashëgimisë sonë kulturore.
Pas një pune disa vjeçare restauruese, në këtë xhami duke përdorur teknikat e fundit të restaurimit tashmë ka në muret e saj, të gjitha afresket origjinale nga koha e ndërtimit. Afresket në muret e saj, të cilat tashmë u rregulluan, janë aq të rralla sa nuk gjendet një xhami e dytë në Shqipëri.
Nën drejtimin e piktorit të njohur Adrian Çene, është bërë një punë e mrekullueshme, në 300 metra katrorë sipërfaqe.
Kjo xhami është e vetmja ndër tetë xhamitë e shekullit 17-18 të ndërtuara në Tiranë. Asnjëra nga të katër fasadat e xhamisë nuk i ngjan njëra-tjetrës.
Faltorja ka 18 dritare në dy rreshta horizontalë, të cilat në numrin më të madh i japin asaj një dritë të kufizuar për të krijuar një ambient mistik. Xhamia e Et’hem Beut, ndër më të vjetrat në Ballkan, është shpallur monument kulture i kategorisë së parë në vitin 1948.
Salla e lutjeve ka planimetri katrore dhe është ndërtuar me vëllim unik mbuluar me kupolë prej llamarine plumbi. Kjo xhami është pjesë e ndërtesave komplekse që përbëjnë qendrën historike të Tiranës dhe përbën një kompleks arkitektonik së bashku me Kullën e Sahatit. Tashmë, pas restaurimit, keni një arsye më shumë për ta vizituar atë.
/dritare.net
