“Dëmi për hapjen e parakohshme të Rrugës së Kombit, ka qenë plot 150 milion Euro. Plot 42 milion Euro në vit na shkojnë për shlyerjen e borxhit për Rrugën e Kombit… Pyetja është shumë e thjeshtë: Duam ne, që rrugën e kombit ta shpëtojmë, apo duam që t’ua lëmë faturën po këtyre të shkretëve dhe po fëmijëve të tyre 7, 8, 10 vjet më vonë, shumë më të kripur”
Kryeministri Edi Rama, i ftuar mbrëmë në emisionin Opinion të Blendi Fevziut, ka patur një moment shpërthimi, gjatë të cilit ka ofruar versionin e tij mbi gjithçka që po ndodh këto ditë, në debatin e madh për Rrugën e Kombit.
“Rruga e kombit është e kërcënuar nga një rrënim i pakthyeshëm”, ka thënë Rama, ndërkohë që ka përmendur rreziqet e kësaj rruge për jetën e qytetarëve. Sipas Ramës, “Rruga e Kombit ka 37 vatra rreziku të çdo momenti për jetën”.
Sipas Ramës, dëmi për hapjen e parakohshme të Rrugës së Kombit, ka qenë plot 150 milion Euro. Kryeministri ka shtuar se nga 110 milion dollarë që qeveria shqiptare paguan çdo vit për të shlyer borxhet e qeverisë së shkuar, plot 42 milion janë shlyerje borxhi pikërisht për Rrugën e Kombit.
“Pyetja është shumë e thjeshtë: Unë jam Kryeministri i vendit, jam njeriu më i painteresuar për të vënë taksa, tarifa dhe detyrime. Sepse në fund të ditës të gjitha këto krijojnë pakënaqësira. Zgjidhja është shumë e thjeshtë: Ose unë mbyll sytë, dhe them sa t’i hyj këtij telashi, më mirë rri dhe shoh rehatin tim në karrike, nuk hyj në asnjë lloj konflikti me këta njerëz që kanë absolutisht të drejtat e tyre të ndihen të pakënaqur për këtë masë, dhe e lë këtë punë që, pas disa vitesh, vrafshin veten siç e lanë të tjerët përpara, ku me vrafshin veten na lanë ne mbrapa gropa që vazhdojmë të përpiqemi t’i mbushim”, ka thënë Rama, i cili ka shtuar: “Pyetja është shumë e thjeshtë: Duam ne, që rrugën e kombit ta shpëtojmë, apo duam që t’ua lëmë faturën po këtyre të shkretëve dhe po fëmijëve të tyre 7, 8, 10 vjet më vonë, shumë më të kripur”. / lexo.al
