Ndërhyrja e vetë kryeministrit në shkarkimin e drejtorit të ALUZINI-it të Beratit pas skandalit të denoncuar nga një 80 vjeçareje dhe më pas shkrirja e kësaj zyre ka patur impakt të madh në opinion publik. Kreu i qeverisë, Edi Rama ka postuar sot të plotë fjalimin e bërë nga kreu i ALUIZNI-t, Artan Lame i cili theksoi se “Kryeministri nuk po kërkon shërbëtorë për vete, por për popullin”.
Ndërsa vetë Rama ka shpjeguar edhe një herë se mandati i dytë qeverisës do të jetë ai i një koalicioni të gjerë qeveri-popull, ku në fokus do të jenë pikërisht shërbimet që do të marrë pala më e rëndësishme, ajo e shoqërisë.
“Ky është rezultati logjik i një historie që nisi me ankesën e një gruaje 80-vjeçare. Dhe mesazhi i këtij rezultati duhet të jetë i qartë për të gjitha drejtoritë dhe zyrat që u shërbejnë qytetarëve: O me popullin dhe për popullin o jashtë librit të pagesave të shtetit! Kjo është ndoshta lufta më e vështirë që një qeveri ka hapur në këta 27 vjet dhe nuk do të jetë aspak e lehtë për ta fituar, por në katër vitet e ardhshme s’do të ketë një minutë të vetëm paqeje mes koalicionit tonë me njerëzit e zakonshëm dhe parazitëve e grabitqarëve në zyrat e shtetit”, shkruan Rama. /ma.me