Kryeministri Rama ka folur sot në opinion për koalicionin me LSI-në dhe nëse Ilir Meta do të jetë kandidat i mazhorancës për President. Lidhur me këtë të fundit, Rama tha se ende nuk kanë diskutuar brenda koalicionit për emra konkretë për President, por nuk e përjashtoi Metën si kandidaturë. Ai foli edhe për koalicionin me LSI-në dhe tha se koalicioni ka problemet e veta, por që nuk ka dështuar në asnjë reformë.
I pyetur nëse do të rinovohet ky koalicion, Rama tha se do të bëhet bilanci i qeverisjes së mandatit të parë dhe më pas do të vendosen piketat. Sa i përket PDIU-së, Rama tha se është në negociata për të vazhduar koalicionin. Rama nuk preferoi të komentonte nëse Blushi do të jetë kandidat i PS-së në zgjedhjet e ardhshme. “Nuk komentoj në publik për deputetët e PS-së dhe anëtarët e Partisë Socialiste”, tha Rama.
Rama: Me mbetjet nuk shkela asnjë zotim. S’ka referendum
Kryeministri Rama ka folur ditën e sotme në emisionin “Opinion” ku është pyetur për ligjin e importit të mbetjeve. Rama tha se Shqipëria nuk mund të importojë plehra për groposje dhe djegie dhe se ligji i sotëm ka qenë i paramenduar.
“I them prapë që Shqipëria nuk mund të importojë plehra. Besoj që po bëhet çdo ditë më e qartë që plehrat janë mbetje që nuk mund të ripërdoren më dhe për këtë arsye digjen dhe groposen.
Këtu s’po flasim për plehra, ne kemi ndaluar importin e plehrave për arsye djegie apo groposjeje në Shqipëri. Kemi ndaluar në vitin 2013 çdo formë importi duke bllokuar edhe hyrjen e mbetjeve të riciklueshme, të vetëdijshëm në këtë aspekt që po bënim diçka që për një periudhë kohe do të shkaktonte probleme për industrinë”, tha Rama. Lidhur me referendumin Rama tha se nuk mund të bëhet një gjë e tillë që shkel interesat e industrisë.
“Referendum për të drejtën e kompanive që të blejnë lëndë të parë jashtë, nuk mund të bëhet. Ata që janë nisur për referendum le ta provojnë”, tha ai.
