Një ndërtese të braktisur pranë Ministrisë së Arsimit në Tiranë i është vënë zjarri nga protestuesit, gjatë ditës së tretë të protestave në kryeqytet.
Pas përhapjes së flakëve, në vendngjarje kanë mbërritur forcat zjarrfikëse, të cilat kanë ndërhyrë për shuarjen e zjarrit dhe për të parandaluar përhapjen e tij drejt objekteve të tjera.
Ndërkohë, efektivët e policisë kanë ndërhyrë për të shpërndarë turmën e protestuesve nga zona, ndërsa vijonin operacionet për shuarjen e flakëve.
Dita e tretë e protestave në Tiranë është shoqëruar sërish me tensione dhe kaos. Protestuesit janë mbledhur në dy raste në rrugën e Durrësit, pranë Ministrisë së Arsimit, ku situata është përshkallëzuar.
Policia ka përdorur ujë me presion dhe gaz lotsjellës për shpërndarjen e turmës, në përpjekje për të vënë situatën nën kontroll.
Protestat, të cilat kanë përfshirë kryeqytetin prej tri ditësh, janë shoqëruar me përplasje dhe dëmtime të pronës publike e private, ndërsa situata vijon të mbetet e tensionuar.
