Pamjet që shihni i përkasin momentit të arrestimit të Artan Biraçit, 37 – vjeç, banues në Shkozë. Vetëm pak minuta më parë ai kishte goditur një efektiv të policisë rrugore në afërsi të rrugës “Xhanfize Keko”, në Porcelan. Një kamerë e Televizionin Klan ka ndjekur momentet e arrestimit të 37-vjeçarit, i cili njihet si përdorues i heroinës.
Ai dyshohet se ishte nën efektin e drogës kur goditi policin. Biraçi, ka qenë duke udhëtuar me makinën e tij dhe nuk i është bindur urdhrit të policisë për të ndaluar. Pak metra më tej ai ka ndaluar, ndërsa sipas burimeve ai ka goditur efektivin e qarkullimit rrugor. Menjëherë pas këtij veprimi, në ndjekje të Biraçit, janë vënë efektivë të policisë rrugore, njësitë “Shqiponja”, si dhe ata të rendit.
Ndjekja zgjati vetëm pak minuta, pasi blutë, i bllokuan lëvizjen atij në afërsi të “Maternitetit të Ri”, në rrugën Odhise Grillo. Madje aty ai goditi edhe një veturë të Policisë Rrugore që i kishte bllokuar rrugën. Menjëherë ai u prangos dhe u dërgua në komisariatin e Policisë nr.4, ku edhe iu komunikua arrestimi në flagrancë. Hetuesit thonë se Biraçi njihet si përdorues i lëndëve narkotike.
Madje hetuesit e policisë dyshojnë se edhe në momentin e incidentit me policin ai dyshohet se ishte nën efektin e heroinës. Ai tashmë pritet të akuzohet për goditje të punonjësit të policisë për shkak të detyrës si dhe drejtimit të mjetit nën efektin e lëndëve narktotike. /ma.me
