Policia Rrugore e Tiranës, ashtu si çdo fundjavë, edhe natën mes të premtes dhe të shtunës është ndalur në autostradën Durrës-Tiranë, me synim rritjen e parametrave të sigurisë.
Kontrollet janë bërë me radar për të parandaluar shpejtësinë tej normave të lejuara, duke u kthyer në burim aksidenti.
Janë konstatuar drejtues mjetesh duke lëvizur me 143, 164 dhe 179 km/h .
“E papranueshme kjo shpejtësi dhe në kushtet e lagështirës në rrugë”, thotë Policia.
Ndërkohë bëhet me dije se janë pezulluar 18 leje drejtimi gjatë orëve të mbrëmjes dhe orëve të para të mëngjesit.
Konstatohet se pavarësisht masave të ndërmarra nga Policia Rrugore e Tiranës, përsëri gjatë ditëve të javës e kryesisht në fundjavë, ka drejtues mjetesh që abuzojnë me shpejtësinë e alkoolin.
“Festoni, argëtohuni por mos abuzoni duke shkelur rregullat e qarkullimit rrugor”, është apeli që bën Policia Rrugore./a.m.
