Përmirësimi i kushteve të motit ka sjellë në Vlorë turistët e tetorit. Rritja e lehtë e temperaturave ka bërë që plazhi i Vlorës të popullohet.
Abcnews raporton se turistët janë kryesisht të huaj nga Bjellorusia dhe Moldavia.
Siç shihet nga pamjet janë të shumtë ata që bëjnë plazh dhe marrin rreze në zonën e “Ujit të Ftohtë”.
Ndërkohë moti i ngrohtë i kësaj të shtune e ka kthyer bregdetin e Adriatikut në një zgjedhje të parë për të kaluar fundjavën.
Qytetarë të shumtë kanë nxituar drejt plazheve të Durrësit e Golemit dhe të tjerë më në jug për të shijuar diellin dhe detin.
Në rrugën e plazhit dhe rrethrrotullimin e Plepave trafiku ka qenë i ngarkuar gjatë orëve të kësaj paraditeje.
Lokalet dhe restorantet e shumta përgjatë bregdetit të Durrësit janë të hapura dhe frekuentohen tashmë dhe në mjediset e brendshme, ndërsa përdorimi i maskave duket i harruar dhe nga punonjësit e shërbimit.
Pushues jo vetëm nga Durrësi dhe Tirana, po dhe nga rrethe të tjera dhe Kosova po marrin kënaqësinë e diellit, detit dhe ajrit të jodizuar në këtë sezon vjeshte.
Era dhe dallgët nuk i kanë ndaluar pushuesit të lahen në det.
g.kosovari
