Dita e tetë e protestës së studentëve ishte parashikuar me një pjesëmarrje të gjerë, sepse, përveç studentëve të Tiranës dhe të rretheve, pritej që përpara Ministrisë së Arsimit të ishin edhe nxënësit e gjimnazeve. Por sa studentë ishin në atë segment të Rrugës së Durrësit, ku ndodhet ministria?
Kryeministri Edi Rama, gjatë reagimit të paradites, foli për rreth 10 mijë pjesëmarrës në protestë. Por burime nga policia thanë se në protestë kanë qenë rreth 6500 persona, nisur nga pamjet ajrore të turmës së mbledhur.
Sipas llogaritjeve sipërfaqja e zënë nga protestuesit ishte rreth 2300 metra katrorë dhe duke llogaritur mesatarisht 3 njerëz për metër katrorë, mendohet se numri i pjesëmarrësve në protestë është rreth 6500.
Organizatorët e protestës kishin ftuar në protestë studentët nga rrethet, por edhe nxënësit e gjimnazeve të Tiranës, të cilët braktisën procesin mësimor. Pavarësisht nga pjesëmarrja aktive në protesta, bojkoti i mësimit sot ka qenë masiv./a.meta
