Pikturat e kryeministrit Edi Rama janë pjesë e edicionit të 57-të të Bienales së Venecias, që është hapur në maj të këtij viti dhe mbyllet në 26 dhjetor.
Kreu i qeverisë merr pjesë në këtë Bienale me koleksionin e vet të vizatimeve “të zyrës”.
Një qytetar shqiptar i cili ka vizituar Bienalen e Venecias ka shkruar në redaksinë e Shqiptarja.com, se vizitorë nga e gjithë bota presion në radhë për të parë këtë Bienale, mes të cilave edhe pikturat e Edi Ramës.
““Bienaleja e Venecias”, hapësira më e rëndësishme, në hyrje të “Padiglione degli artisti” (dhe jo tek stenda e Shqipërisë) ku performojnë artistët më prestigjozë ndërkombëtarë, i rezervohet një punimi artistik të tij, si shqiptar nuk kam sesi të mos ndihem krenar dhe të vlerësoj faktin që qindra mijëra artdashës nga e gjithë bota, presin në radhë për të parë këtë bienale”, shkruan qytetari për Shqiptarja.com.
Në video-prezantimin e artistit Rama, ai shfaqet në pozicionin e Kryeministrit, duke hyrë e duke dalë në zyrën kryeministrore, duke komunikuar me stafin, mediat, duke folur në konferenca, por pa u ndarë për asnjë moment nga pasioni i tij, piktura.
Rama e prezantoi zyrën e tij si njëlloj atelieje, ku ai vizaton, jo vetëm kur arrin t’i “vjedhë” kohës pak minuta të lira, por edhe gjatë mbledhjeve apo takimeve me njerëz të ndryshëm.
