Policia e Tiranës ka ndërmarrë dy operacione anti-drogë mbrëmjen e kaluar, duke arrestuar 6 persona dhe shpallur në kërkim 3 të tjera. Ka qenë drejtori i Policisë së Tiranës, Ardi Veliu që ka dhënë detaje për operacionet, ku është kapur mbi një ton drogë.
Në sajë të operacioneve “Befasia” dhe “Papafingo”, janë sekuestruar 1 ton e 290.9 kg drogë, një armë zjarri, automjete e celularë.
Strukturat e Drejtorisë Vendore të Policisë Tiranë, gjatë punës së pandërprerë, për goditjen e “Prodhimit dhe shitjes së narkotikëve”, si dhe në vijim të goditjeve të njëpasnjëshme të bëra kohët e fundit, në 24 orët e fundit ka zhvilluar dhe finalizuar 2 operacione antidrogë, të koduara “Befasia” dhe “Papafingo”.
Si rezultat i këtyre operacioneve është sekuestruar një sasie e madhe lënde narkotike, konkretisht 1 ton e 291 kg lëndë narkotike e dyshuar Cannabis Sativa, 1armë zjarri, 2 automjete dhe 6 telefona celularë.
