Në një operacion të zhvilluar brenda tunelit të Murrizit, efektivë të policisë së Tiranës kanë arrestuar një 22-vjeçar që transportonte armë zjarri nga Burreli në drejtim të kryeqytetit.
Sipas policisë, në operacionin e koduar “Tuneli” u sekuestruan 2 kallashnikovë që do të shiteshin për llogari të grupeve kriminale.
Gjithashtu janë gjetur 4 krehra për armët e zjarrit, të cilat janë sekuestruar së bashku me automjetin dhe celularin e 22-vjeçarit.
“Shërbimet e Komisariatit të Policisë Nr. 4 kanë siguruar informacion se një shtetas qarkullonte me armë zjarri në automjet. Si rezultat i administrimit të shpejtë të këtij informacioni është organizuar dhe finalizuar operacioni i koduar “Tuneli”, gjatë të cilit u arrestua shtetasi: A. D., 22 vjeç, banues në Burrel. Gjatë operacionit, në tunelin e Murrizit, shërbimet e Policisë kanë ndaluar automjetin që drejtonte 22-vjeçari, në të cilin, gjatë kontrollit, gjetën të fshehura në bagazh, 2 armë zjarri kallashnikov dhe 4 krehra për to”, informon policia.
Sakaq sipas Bluve, vijojnë hetimet për dokumentimin e kësaj veprimtarie kriminale, identifikimin dhe kapjen e shtetasve të tjerë që mund të jenë përfshirë.
Mbi të riun ndërkohë rëndojnë vepra penale “Mbajtja pa leje dhe prodhimi i armëve, armëve shpërthyese dhe i municionit”.
