Nuk është fjala për ndonjë dashuri, por irakianët po e kërkojnë Saddam Husseinin, pasi anarkia dhe terrori u dolën më të këqij se diktatura e tij.Në momentet e rënies së Saddamit nga makineria luftarake amerikano-britanike, një fotografi e prillit 2003 e përshkoi botën. Fjala është për rënien e monumentit të diktatorit irakian.
13 vjet më vonë, Washington Post ka gjetur personazhin kryesor të këtij momenti, Khadim al-Jabbouri. Ai u gjet në mesin e një milion refugjatëve të shpërndarë në kampe të Libanit. Por, sot ai pendohet për atë që ka bërë, madje ndjehet i turpëruar, transmeton Telegrafi.
“Edhe atëherë kishte korrupsion, konflikt, vrasje dhe plaçkitje. Isha aq i lumtur kur ra nga pushteti. Por, Saddami ra e në vend të tij erdhën 1000 Saddama tjerë”, thotë ai, duke shtuar se më shumë se kurrë do të donte që diktatori të kthehej nga varri në postin e tij të dikurshëm. Çuditërisht, këtë e thotë një njeri që ishte mekaniku personal për motoçikleta i familjes së Saddamit, por që ra në burg e që regjimi i atëhershëm ia kishte vrarë 15 anëtarë të familjes së gjerë.
“Bushi (George W.) dhe Blaira (Tony) janë gënjeshtarë. E shkatërruan Irakun, na çuan në zero, në nivelin e Mesjetës e ndoshta më poshtë. Po të isha kriminel, do t’i vrisja me duart e mia”, ka thënë ai.
