Një incident tragjik ndodhi në marinën Fort Lauderdale, Florida, të hënën në mbrëmje, kur një anije shpërtheu në flakë, duke shkaktuar vdekjen e një personi dhe lëndimin e pesë të tjerëve. Ekipet e zjarrfikësve u përgjigjën rreth orës 18:00 pas thirrjeve të shumta për ndihmë, raportojnë mediat amerikane.
Kur ekipet mbërritën, zjarrin tashmë kishte përfshirë një pjesë të madhe të anijes dhe ishte përhapur edhe në një tjetër anije aty pranë, shkruan A2 CNN. Pamjet e kamerave tregojnë momentin dramatik të shpërthimit.
Zjarrfikësit arritën ta shuajnë zjarrin, por varka u shkatërrua plotësisht. Varka e dytë pësoi vetëm dëme të pjesshme. Pesë persona u dërguan në spital me lëndime të rënda. Për fat të keq, një person i shpallur i zhdukur u gjet më vonë i pajetë nga zhytësit dhe agjencitë e tjera të kërkimit. Autoritetet ende nuk kanë identifikuar viktimat dhe po hetojnë shkaqet e shpërthimit.
