Ukraina kreu të premten një sulm me raketa ndaj bazës kryesore të flotës ruse në Detin e Zi.
Video dhe foto të publikuara treguan re të mëdha tymi të ngriheshin mbi godinën që ndodhet në Sevastopol, në Krimenë e aneksuar.
Të paktën një person humbi jetën, ndërsa zjarrfikësit u ndeshën me flakët në ambientet e bazës ku u thirrën forca shtesë.
Gjithashtu, një zinxhir ambulancash mbërriti në vendin e ngjarjes, ku dëmet e shkaktuara arrinin në disa qindra metra përreth.
Sipas Ministrisë ruse të Mbrojtjes, 5 raketa të tjera që kishin si shënjestër godinën e bazës u rrëzuan nga sistemet e mbrojtjes ajrore. Ndërkohë që raketa që goditi në shenjë i mori jetën një ushtaraku.
BBC ka publikuar këtë të shtunë dhe momentin kur raketat e Ukrainës shembingodinën e Flotës Ruse në Detin e Zi.
Nga ana tjetër, zyrtarët ukrainas, që kanë marrë përsipër përgjegjësinë për një seri sulmesh të tjera ndaj Krimesë, nuk njoftuan se ishte Kievi që kishte ndërmarrë sulmin.
Forcat e Kievit kanë nisur kohët e fundit sulme pothuajse ditore kundër forcave ruse me bazë në Krime.
Javën e kaluar, marina e Ukrainës pretendoi se kishte rrëzuar një bateri raketore të mbrojtjes ajrore S-400 që mbulonte gadishullin, duke paraqitur paaftësinë e Rusisë për t’u mbrojtur kundër sulmeve të reja.
Një ditë më parë, një anije e madhe ruse zbarkuese dhe një nëndetëse u dëmtuan në një sulm për të cilin Ukraina tha se përdorte gjithashtu raketa Storm Shadoë.
Sulmet ndaj Krimesë janë të rëndësishme strategjike dhe simbolike.
Përveçse është një platformë për të sulmuar Ukrainën, flota e Detit të Zi është një simbol kryesor i pranisë ushtarake shekullore të Rusisë në rajon.
Ajo ishte e bazuar në Krime nën një marrëveshje qiraje edhe para se Rusia të aneksonte ilegalisht gadishullin në vitin 2014./m.j
