Agjencia e Mbikëqyrjes Policore ka vënë në pranga një punonjës policie në Elbasan. Saimir Hysi akuzohet se ishte i përfshirë në shit-blerje lëndësh narkotike, favorizonte personat që kryenin të njëjtën veprimtari, si dhe ndihmonte në fshehjen e personave në kërkim. Gjithashtu punonjësi i policisë akuzohet se ishte i përfshirë dhe në shitjen e armëve dhe municioneve luftarake kundrejt përfitimeve në lekë.
Ai është i dyshuar se ka konsumuar veprat penale “Shpërdorimi i detyrës”, “Korrupsioni pasiv i personave që ushtrojnë funksione publike”, “Mbajtja pa leje dhe prodhimi i armëve, armëve shpërthyese dhe i municionit” dhe “Prodhimi dhe shitja e narkotikëve”.
Gjithashtu, janë arrestuar Loren Pushi 30 vjeç dhe Ersi Pushi 22 vjeç, të dyshuar për kryerjen e veprës penale “Prodhimi dhe shitja e narkotikëve” Hetimet vijojnë për evidentimin e autorëve të tjerë të përfshirë në këtë aktivitet kriminal.
