Dialogu ndërmjet Serbisë dhe Kosovës ka ngecur dhe dy vendet duket se janë në një gjendje konflikti të papërfunduar.
Në një intervistë për gazetaren Ilva Tare, publicisti i njohur dhe ish politikan nga Kosova, Veton Surroi, flet për rrugën përpara për të dy vendet.
Ai u shpreh se kjo marrdhënie është një konflikt i papërfunduar i cili kërkon një dialog serioz. Publicisti Surroi u shpreh se Kosova nuk duhet të jetë jashtë nismës ‘Open Balkan’.
Sipas Surroit, bisedimet kanë ardhur në një pikë që duhet të bëhen serioze, që do të thotë se duhet të jenë bisedime për gjendjen aktuale të marrëdhënieve mes Kosovës dhe Serbisë si shtete dhe si të mund të normalizohen ato.
“Për, sa kohë ka çështje si njohja e targave, e të tjera si këto, që marrin vëmendjen dhe energjitë, atëherë bisedimet nuk kanë sjellë asnjë ndryshim për marrëdhëniet mes dy vendeve. Fatkeqësisht, dialogu ka hyrë në një fazë mikro-menaxhimi, jo tani, por prej vitesh tashmë. Ndaj sfida kryesore është si të nisë një dialog ku palët të përballen me ankesat e tyre,” shprehet ai.
Surroi nënvizon se marrëdhënia aktuale midis dy vendeve është ajo e një konflikti të papërfunduar.
“Duhet arritur në një pikë ku të dy shtetet bien dakord të punojnë për një të ardhme më të mirë, ku të bashkëpunohet dhe të gjendet, jo vetëm paqja, por edhe një formë e përparuar integrimi në familjen europiane. “Duhet të jetë përpjekja jonë e përbashkët. Çështja mbetet, si do arrijmë në pikën që marrëdhëniet Kosovë-Serbi të jenë si ato të dy shteteve europiane,” thotë ai.
I pyetur se cila është rruga për të ecur përpara me dialogun, Surroi u përgjigj se: “duhet një mirëkuptim mes palëve se si do të ndajmë të njëjtat marrëdhënie që shtetet europianë kanë, siç janë liritë europiane, katër liritë e lëvizjes dhe më pas ne angazhohemi në një proces, i cili, jo vetëm do t’i japë fund konfliktit, por do të hapë një epokë të re në marrëdhëniet dypalëshe, ku ekonomitë tona komunikojnë, njerëzit komunikojnë, shtetet dhe kulturat tona komunikojnë.”
Veton Surroi është i mendimit se Prishtina dhe të gjitha palët të gjashtë vendeve të Ballkanit Perëndimor duhet të angazhohen në Procesin e Berlinit.
“Kemi nevojë për të arritur objektivat që janë parashkruar në marrëveshjen e Sofjes për të ndihmuar Tregun e Përbashkët Rajonal. Objektivi ynë është si të arrijmë tek Tregu i Përbashkët Rajonal mes të gjitha vendeve të Balkanit brenda një kohe relativisht të shkurtër. Duhet të vendosim pritshmëri të matshme, për shembull, cilat janë 10 gjërat që na duhen në 6 muajt e ardhshëm për të përforcuar procesin dhe të kemi rezultate konkrete” shprehet ai.
On this episode of #BalkansDebrief, publicist @VSurroi joins @ilvatare to discuss the #Kosovo–#Serbia relationship. Surroi calls the relationship “an unfinished conflict …needing serious dialogue.” https://t.co/nroTAD1SVx
— Europe Center (@ACEurope) June 9, 2022
/e.d
