Një ngjarje mjaft e çuditshme ka ndodhur të shtunën paradite pranë gjimnazit “Petro Nini Luarasi” në Tiranë.
Për shkak të trafikut të rënduar në atë rrugë, një furgon i verdhë u fut në parakalim duke dalë në korsinë e mjeteve që vinin nga drejtimi i kundërt. Por përpara i doli një ciklist i cili vazhdoi të ecë pa e hapur rrugën.
Kokëfortësia e këtij veprimi bëri që furgoni për pak ta përplaste, por pa e arritur. Kaq mjaftoi që çiklisti të zbriste nga biçikleta e tij, të hiqte zinxhirin dhe si në një skenë filmash me aksion, të godiste furgonin me të duke i thyer xhamat dhe duke goditur llamarinën. Pasi kaluan 6-7 minuta ku ndërkohë çiklisti vazhdonte ende të godiste me zinxhir, ai befas pushoi, mori biçikletën dhe u largua sikur s’kishte ndodhur asgjë, raporton “JOQ”.
Kalimtarët e rastësishëm u habitën nga e gjithë skena dhe lajmëruan policinë, por çiklisti “trim” arriti të largohet përpara mbërritjes së tyre. Raportohet se brenda në furgon ndodheshin edhe tre persona të tjerë përveç shoferit, dhe asnjëri prej tyre nuk doli nga automjeti derisa çiklisti mbaroi “tërbimin” e tij./a.m.
