Dasma e vëllait të këngëtares shqiptare Bebe Rexha është vënë në qendër të vëmendjes këto ditë, për shkak të atmosferës tipike shqiptare, me këngë e valle mjaft të dëgjuara, ndërsa të pranishëm janë parë dhe artistë mjaft të preferuar.
Në mesin e tyre spikas dhe këngëtari mjaft i preferuar shqiptar, Ledri Vula, i cili ka dhuruar një performancë të veçantë me këngën e tij “Tavolina”, në dasmën e Florent Rexhës që kurorëzoi dashurinë e tij me influenceren e njohur Dorina Papraniku, në një martesë tradicionale dhe moderne shqiptare në tetor 2026.
Teksa Vula këndonte këngën e tij, artistit iu bashkuan dhe të pranishmit duke kënduar pjesën, “Milionero, milionero, kena shumë euro”, ndërkohë që tufat e parave duket se kanë mbushur dyshemenë.
Në dasmën e Florent Rexhës ishin të ftuara dhe dy këngëtaret e njohura Yllka Kuqi dhe Merita Halili, pjesëmarrja e të cilave ka tërhequr goxha vëmendje.
Në ditën e veçantë të familjes Rexha nuk mungoi as performanca e vetë Bebe Rexhës si dhe tupanat, që ndezën atmosferën e dasmës.
