Një mbret i ri Zulu është kurorëzuar sot në një ngjarje historike të ndjekur nga mijëra persona në qytetin bregdetar të Afrikës së Jugut, Durban.
Lajmin e bëjnë të ditur mediat e huaja, të cilat thonë se bëhet fjalë për mbretin Misuzulu ka Zwelithini, i cili u njoh zyrtarisht si monark nga Presidenti Cyril Ramaphosa, i cili i dha atij një certifikatë njohjeje.
Ceremonia ishte kurorëzimi i parë zulu që kur Afrika e Jugut u bë demokraci në 1994.
Me këtë ceremoni ka pwrfunduar edhe një grindje e gjatë dhe e hidhur për të gjetur një pasardhës për Mbretin Goodwill Zwelithini, i cili vdiq vitin e kaluar.
Ai ishte monarku Zulu me mbretërimin më të gjatë, pasi kishte shërbyer në fron për gati 50 vjet.
Ai kishte gjashtë gra dhe të paktën 26 fëmijë.
Vdekja e papritur e nënës së mbretit Misuzulu një muaj pasi u emërua mbretëreshë regjente, pas vdekjes së burrit të saj thelloi më tej një luftë për pushtet në oborrin mbretëror.
Princi Bambindlovu Zulu tha për BBC se ai besonte se vëllai i tij do të bashkonte monarkinë dhe popullin e tij.
“Prindërit tanë do të ishin krenarë për këtë moment”, tha ai. “Unë mendoj se ai do të jetë një mbret i madh.”
Në fjalimin e tij të parë pas kurorëzimit të tij, Mbreti Misuzulu tha se ai kishte nisur një udhëtim me komunitetin dhe shpresonte të ishte një “katalizator” për të sjellë ndryshime pozitive.
“E kuptoj që historia më ka zgjedhur në këtë kohë kur zulutë po përballen me disa sfida”, tha ai. “Sfidat janë varfëria, papunësia, deficiti i besimit te qeveria dhe lidershipi tradicional, ndryshimet klimatike dhe pasiguria ushqimore”.
Presidenti Ramaphosa citoi Shaka Zulu, udhëheqësin më me ndikim të komunitetit të shekullit të 18-të, duke thënë: “Ai, perandori Shaka, do të thoshte: “Në të djathtën time është kombi, në të majtën time janë klanet e mi, kjo është lidhja që na lidh së bashku”.
“Madhëria juaj, ju jeni lidhja që lidh kombin Amazulu.”
Këngët festive dhe vallëzimi shoqëruan çdo folës në këtë ngjarje, e cila u shënua me një përzierje të kulturës tradicionale Zulu dhe lutjeve të krishtera.
Kurorëzimi u bë disa ditë pasi SHBA paralajmëroi për rrezikun e një sulmi terrorist në vend.
Disa personalitete vendase dhe të huaja ishin midis dhjetëra mijëra njerëzve që morën pjesë në ceremoninë në stadiumin Moses Mabhida.
Kurorëzimi i fundit u bë në një ditë me shi në vitin 1971 nën qeverinë e aparteidit, kur u kurorëzua Mbreti Goodwill Zwelithini ka Bhekuzulu.
Kush është Misuzulu i Zwelithini-t?
Ai ka lindur më 23 shtator 1974 në Khwalabisa.
Ështe edukuar privatisht në Kolegjin St Charles në Pietermaritzburg.
Ka studiuar në Jacksonville University në SHBA, ku ka jetuar për disa vite.
Gjithashtu ai eshte i martuar me dy gra, dhe ka tre djem./m.j
