Sot, falë teknologjisë është bërë e mundur që korrespondentët e mediave ndërkombëtare të mund të raportojnë herë pas herë nga komoditeti që u ofron shtëpia.
Por, jo gjithmonë raportime të tilla shkojnë siç duhet, si në rastin e korrespondentit të BBC-së në Korenë e Jugut, Robert E. Kelly.
Kelly po raportonte direkt nga Busani duke shfrytëzuar lidhjen me Skype dhe gjithçka po shkonte mirë deri në momentin kur dera e dhomës hapet dhe në të futet një fëmijë.
Korrespondenti, si një profesionist i vërtetë ruan qetësinë dhe largon disi fëmijën. Por pikërisht kur u mendua se ja hodhi, në derë shfaqet një tjetër fëmijë, ky akoma më i vogël dhe i vendosur në një rrethore dhe biberon në gojë.
Edhe në këtë situatë Kelly nuk e dha veten, por më e keqja nuk kishte kaluar ende. Në derë shfaqet një grua, me gjasa kujdestarja e fëmijëve, e cila me këmbë e duar arriti që të largojë fëmijët dhe të mbyllë derën.
