Në aeroportin e Palma në Spanjë, në orët e para të së premtes, 4 korrik, paniku kaploi pasagjerët brenda avionit të Ryanair që do niseshin drejt Manchester-it. Kjo pas një alarmi të rremë zjarri në kabinën e pilotimit, që shkaktoi evakuim emergjent. Disa pasagjerë u hodhën nga krahët e avionit në pistë për të ikur sa më shpejt.
Avioni ishte gati për fluturim kur u aktivizua gabimisht sinjali i alarmit të zjarrit, duke detyruar pasagjerët të largohen me nxitim. Autoritetet raportuan të paktën 18 të lënduar, prej të cilëve 6 u dërguan në spitale lokale për trajtim.
Dëshmitarët e përshkruan skenën si kaotike, ku shumë prej pasagjerëve përdorën daljet emergjente mbi krahun e Boeing 737 dhe u hodhën në tokë.
Shërbimet e emergjencës mbërritën në vendin e ngjarjes rreth orës 00:35. Ryanair konfirmoi më pas se alarmi i zjarrit ishte i rremë. Ryanair organizoi një fluturim tjetër duke kërkuar ndjesë zyrtarisht për çdo shqetësim ndaj pasagjerëve.
Ngjarja ngriti shqetësime për sigurinë dhe efikasitetin e procedurave të evakuimit emergjent.
