Një ish-mësues italian, i shpallur në kërkim prej 4 vitesh nga drejtësia e vendit të tij për dhunë seksuale me të mitur, është arrestuar mbrëmjen e së mërkurës në Tiranë, gjatë një operacioni të përbashkët mes Policisë shqiptare dhe asaj italiane.
Masimilliano Croce, 45 vjeç, nga Ciampino, Romë, i diplomuar për pedagogji për të mitur, u arrestua në periferi të kryeqytetit, ku ishte strehuar në një banesë me qira. Sipas vendimit të Gjykatës italiane, 45-vjeçari, në një periudhë prej 7 vitesh, nga viti 2007 deri në 2014, ka kryer krime kundër të miturve, abuzime seksuale me fëmijë dhe pedofili.
Ndërkohë, në vitin 2017 është dënuar nga Gjykata italiane me vendim të formës së prerë, me 16 vite burg, për veprën penale “Dhunë seksuale ndaj të miturve”. Sipas dosjes së Policisë italiane, gjatë periudhës së kryerjes së këtyre krimeve, Croce ka shërbyer si mësues komuniteti për fëmijët e varfër dhe jetimë, në provincat e Romës dhe në qytetin e Romës. Drejtori i Policisë Kriminale, Eduart Merkaj, tha dje gjatë një konference për shtyp, se hetimet e përbashkëta me Policinë italiane kanë nisur në mes të tetorit dhe janë mbyllur në më pak se 15 ditë me arrestimin e tij.
Operacioni u krye në bashkëpunim të ngushtë mes Policisë së Shtetit me Shërbimin Qendror Operativ në Drejtorinë e Përgjithshme Antikrim, skuadra e lëvizshme e kuesturës së Romës dhe Zyra e Interforcës pranë ambasadës italiane në Shqipëri.
AKUZAT
Sipas raportimeve të mediave italiane, ish-mësuesi Masimilliano Croce që u arrestua në Tiranë, është dënuar dy herë për krime kundër të miturve dhe pedofili. Dënimi i parë për të është dhënë në vitin 2014 dhe dënimi i fundit në vitin 2017, pas të cilit ai u shpall në kërkim ndërkombëtar. Hetimet e organeve ligjzbatuese italiane kishin zbuluar edhe një tjetër rast abuzimi ndaj të miturve në vitin 2015, duke nisur investigimin, pas të cilit u siguruan provat e nevojshme që sollën edhe dënimin e tij në mungesë.
Ai i ishte shmangur përballjes me drejtësinë për 4 vite me radhë dhe nëpërmjet avokatit të tij nuk kishte shfaqur pendesë për krimet e kryera, madje ka akuzuar autoritetet që e kanë persekutuar. “Ish-mësuesi Masimilliano Croce, në prill të vitit 2014 u dënua me 9 vjet burg për abuzimin e vazhdueshëm seksual ndaj një fëmije 8 vjeç, në një shtëpi ku ai kishte shërbyer. Por para kësaj, ai ishte dënuar edhe me 3 vjet burg për akuzën e dhunës ndaj fëmijëve të tjerë, që i ishin besuar atij në kujdesin shtëpiak.
Por pavarësisht provave të paraqitura nga organi i akuzës, Croce gjithmonë e ka konsideruar veten të persekutuar nga drejtësia. Ndërsa në dënimin përfundimtar, gjyqtarët parashikuan edhe ndalimin e përhershëm të tij, që të punojë në zyrat publike dhe punët që përfshijnë kontaktet me të miturit, si një dënim plotësues”, shkruan e përditshmja italiane “Il Messagero.it”.
Në seancën gjyqësore të zhvilluar në mungesë të 45-vjeçarit italian, prokurori i çështjes, Stefano Roço, ka argumentuar akuzat e ngritura ndaj të dyshuarit, duke u shprehur se ai ishte një person që, duke shfrytëzuar mundësinë e tij në institucionet ku jetojnë të mitur, ka përfituar për të arritur qëllimet e tij seksuale me të mitur. Sipas vendimit të gjykatës që e shpalli atë fajtor dhe e dënoi me 16 vjet burg, Croce është provuar se ka abuzuar seksualisht me një 14-vjeçar, i cili jetonte në një nga qendrat komunitare për të mitur.
ma.me
