Ish-truproja i Sali Berishës, Izet Haxhia, i akuzuar për vrasjen e Azem Hajdarit është ekstraduar mbrëmjen e sotme nga Turqia. Avioni me të cilin ai fluturoi drejt Shqipërisë, u ul në Aeroportin e Rinasit në orën 20:10.
Jane publikuar pamjet nga ulja e avionit, e deri tek trasferimi i tij tek mjetet e policisë, që ishin vënë në dispozicion.
Për shoqërimin e tij në ambientet e burgut 313 në Tiranë, ishin angazhuar forca të shumta policie.
Pasi zbriti nga një avion i “Turkish Airlines”, ai hipi në një nga mjetet që ndodheshin përreth avionit, për të garantuar sigurinë.
Në aeroport, Izet Haxhinë e prisnin punonjës të policisë së Tiranës, të Interpol, dhe një grup i gatshëm i burgjeve, i cili bëri edhe shoqërimin e tij në ambientet e burgut 313.
Haxhia u vetëdorëzua tek autoritetet turke, ndërsa lajmin e njoftoi përmes faqes në Facebook. Pak ditë më pas ai zgjodhi në Shqipëri avokatin Fran Dashi.
Izet Haxhia u arrestua në vitin 2006 në Turqi, por drejtësia turke nuk ishte shprehur ende për ekstradimin e tij, ndonëse pala shqiptare kishte bërë kerkesa të vazhdueshme në kohën kur në pushtet ishte Sali Berisha.
Për 12 vjet me radhë gjykata turke kishte urdhëruar thjesht që ai të mos largohej jashtë vendit, ndërsa në shkurt të këtij viti befas u mor vendimi që ai të ekstradohet. Izet Haxhia është dënuar nga gjykata shqiptare me 25 vite burg për vrasjen e Azem Hajdarit, akuzë të cilën ai nuk e ka pranuar kurrë. Ekstradimi i tij në Shqipëri mund të çojë në hapjen e dosjes ‘Hajdari’.
a.ç
