Krahas investimit për rivitalizimin e qytetit alpin të Pukës, tashmë një tjetër investim është drejt përfundimit dhe do të jetë në dispozicion të qytetarëve të Pukës dhe turistëve që zgjedhin këtë qytet për të kaluar fundjavat e tyre.
Bëhet fjalë për projektin 60 milionë lekë të Unazës së Pukës që është drejt përfundimit. Kryebashkiaku i Pukës, Gjon Gjonaj u shpreh se kjo është një dritare e re për qytetarët e Pukës që do mundësojë disa avantazhe për vizitorët në qytet dhe banuesit e tij. “Një rrugë e re, një dritare e hapur për qytetarin pukjan për të parë drejt të ardhmes, drejt atij destinacioni prej ku është nisur Puka nën kujdesin e qeverisë shqiptare”.
“Falë vëmendjes sonë dhe përkujdesjes së qeverisë shqiptare u bë e mundur dhe realizimi i këtij objektivi madhor. Sot me këtë rrugë, zhvillohet një arterie e re, që do na mundësojë lëvizjen e lire të qytetarëve në pedonale. Nuk do të na krijoj ngushtime në trafik në furnizimin e njësive tregtare dhe po ashtu do mundësojë lëvizshmëri më të lehtë drejt qendrës së shëndetit publik”, tha Gjonaj.
“Investimi i nisur prej afro 1 viti pritet të përfundoj në pak dit. Ky investim pritet të shoqërohet me investime të tjera me qëllim që Puka të shndërrohet në çdo skaj të saj të shndërrohet në një qytet turistik.
