Ministrja e Shëndetësisë dhe Mbrojtjes Sociale Ogerta Manastirliu, ka ndarë në faqen e saj në Facebook një mesazh të mjekut Perlat Kapisyzi, pas mbylljes së Spitalit COVID2. Në mesazhin e tij, drejtuesi i Spitalit ‘Shefqet Ndroqi’, i konsideruar si Spitali COVID 2, shprehet se situata e epidemisë u përballua me sukses pasi personeli shëndetësor në këtë spital që prej ditës së parë dhe deri në fund shërbeu me vetëmohim dhe dhembshuri.
“Unë do të desha ta filloj me disa veti që personeli shëndetësor jo vetëm i spitalit universitar “Shefqet Ndroqi” por gjithë Republikës, qëndrueshmëri, guxim, vetëmohim dhe gjithashtu dhembshuri. Kanë qenë këto virtytë më të cilët ne luftuam, përballuam këtë situatë. Janë këto virtyte të cilat ne realizuam jo vetëm kujdesin për pacientin, jo vetëm kujdesin për kolegun por edhe kujdesin për familjarët”, tha Kapisyzi.
Duke u shprehur se qellimi ishte për sheshimin e kurbës, Kapisyzi tha se kontribuan gjithashtu për të sheshuar çdo të pavërtetë për vlerat morale të personelit shëndetësor.
“Kontribuam me aq sa mundëm, por nga ana tjetër kontribuam për të sheshuar çdo të pavërtetë për vlerat morale të personelit shëndetësor. Dhe shpresoj që është një sheshim i plotë. Është e vërtetë që komuniteti duartrokiti për ne, por kur pandemia të marrë fund dhe ne duartrokasim për në rradhë të parë ato pacientë të cilët realisht kanë vuajtur por edhe na kanë besuar. Gjithashtu edhe për komunitetin i cili na duatrokiti, na mbështeti, na dha kurajo dhe shpresojmë që të na duartrokasë mbas Covid-it. Sepse ne kemi qënë, jemi ato që kemi qenë. Këto virtyte nuk u bënë për dy muaj”, tha Kapisyzi në mesazhin e tij.
Spitali COVID2, nisi trajtimin për koronavirusin që nga 28 Marsi dhe ka trajtuar mbi 60 pacientë. Prej ditës së hënë ky spital i’u rikthehet normalitetit duke mbyllur shërbimin për trajtimin e pacientëve të prekur nga COVID19 për të vijuar me ofrimin e shërbimit për pacientët si më parë.
g.kosovari
