Pamjet që shihni vijnë nga shtëpia ku ndodhi ngjarja e rëndë në Elbasan, ku një çift bashkëshortësh u gjetën të pajetë. BW sjell nga vendi i ngjarjes detaje nga vdekja e Shyqo (Vasil) Liçit, 65 vjeç dhe gruaja e tij Sabire Liçit, 60 vjeçe, të cilët u gjetën të djegur në shtëpinë e tyre në fshatin Gjergjan, por dyshimet e policisë janë se kryefamiljari i vuri vetë flakën banesës.
Po ashtu ‘BalkanWeb’ ka arritur të sigurojë edhe pamje nga kati i parë i banesës, ku shihet një bombol gazi, e cila duket se ka shkaktuar gjithçka, ndërsa përreth duket pëlhuri i zi. Gjurmët e tragjedisë shihen që në hyrje të shkallëve, ndërsa një palë këpucë burrash qëndrojnë tek dera kryesore. Flakët si fillim janë përhapur në një nga paradhomat e shtëpisë dhe më pas janë djegur kolltuqe dhe orendi shtëpiake.
Mësohet se trupat e pajetë të çiftit u nxorën nga banesa rreth orës 02:00, ndërsa ndodhen në morgun e Elbasanit. Siç shihet edhe nga pamjet që publikon ‘BalkanWeb’ dy viktimat jetonin të vetëm në një banesë të re 2-katëshe.
Siç u raportua edhe më herët akti ekstrem dyshohet të jetë marrë nga burri për shkak të sëmundjes së rëndë të gruas dhe neglizhencës së tre fëmijëve emigrantë të çiftit që nuk iu telefonin prej kohësh.
Gazetari i BW raporton se një bombol gazi është gjetur e çmontuar qëllimisht në katin e parë dhe një tjetër në katin e dytë të banesës ku jetonin burrë e grua. Aktualisht në banesë ndodhet grupi hetimor, i cili po punon për zbardhjen e rrethanave të ngjarjes. /b.d
