Shërbimet e Komisariatit të Policisë Korçë, pas informacioneve të siguruara në rrugë policore se një shtetas posedonte armë dhe lëndë narkotike, kanë ushtruar kontroll në banesën e të dyshuarit, në lagjen nr. 4, Korçë ku kanë sekuestruar kokainë gati për shitje, një armë sportive, dy armë të ftohta dhe një peshore elektronike.
Në pranga ra shtetasi A. H., 53 vjeç (me precedent të mëparshëm penal në fushën e krimeve kundër personit).
“Forcat e Policisë, gjatë kontrollit në banesën e shtetasit A. H., kanë gjetur disa doza me lëndë të dyshuar narkotike kokainë gati për shitje, letër alumini e bërë gati për përgatitjen e dozave, një sasi përzierësi, një peshore elektronike, një armë pistoletë sportive, dy armë të ftohta dhe dy suportera kartash Sim, të cilat u sekuestruan në cilësinë e provës materiale”, ben me dije policia.
Materialet i kaluan Prokurorisë pranë Gjykatës së Shkallës së Parë Korçë, për veprat penale “Prodhimi dhe shitja e narkotikëve”, “Mbajtja pa leje e armëve sportive”, “Mbajtja, blerja apo shitja pa leje e armëve të ftohta”.
g.kosovari
