Grabitja e një shume të konsiderueshme parash në një banesë në Shkodër është zbardhur nga policia, që ka shpallur në kërkim 2 autorët e ngjarjes.
“Specialistët për Hetimin e Krimeve të Komisariatit të Policisë Shkodër, si rezultat i veprimeve intensive hetimore të kryera për zbardhjen e vjedhjes së një shume të konsiderueshme parash, më datë 12.02.2025, në një banesë në lagjen “Qemal Stafa”, kanë identifikuar dhe shpallur në kërkim autorët e dyshuar të këtij rasti, shtetasit: F. Sh., 27 vjeç, banues në Shkodër, për veprën penale “Vjedhja” me pasoja të rënda, kryer në bashkëpunim; M. Gj., 34 vjeç, banues në Shkodër, për veprën penale “Vjedhja” me pasoja të rënda, kryer në bashkëpunim dhe “Prodhimi dhe shitja e narkotikëve’”, informon policia.
Uniformat blu sqarojnë se gjatë kontrollit në banesën e 27-vjeçarit janë gjetur dhe sekuestruar 3 maska, 1 kapuç, 5 celularë, 5 palë targa dhe sende të tjera të kundërligjshme.
Ndërkohë, gjatë kontrollit në banesën e 34-vjeçarit është gjetur një sasi kanabisi.
