VIDEO/ Gentiana Sula: Tranzicioni u soll me hipokrizi ndaj të përndjekurve! Fëmijëve të internimit u detyrohemi njohje ligjore!

Kryetarja e Autoritetit të Dosjeve, AIDSSH, Gentiana Sula, ishte sot e pranishme gjatë “Turit Shenjues Përkujtimor “Peizazhe të Internimit”, në fshatrat e Lushnjës.

Turi nisi me homazhe në Memorialin e Përndjekjes Politike dhe vijoi në Savër, ku mori pjesë edhe Presidenti i Republikës, Bajram Begaj, më pas në Gjazë, në ish-Burgun e Grave në Kosovë të Madhe, në Plug dhe në shkollën “Lek Pervizi”.

Duke folur në Savër, Sula deklaroi se tranzicioni shqiptar u soll shpesh me hipokrizi, zvarritje dhe neglizhencë ndaj viktimave të diktaturës.

“Shumë prej tyre ikën pa gjetur eshtrat e njerëzve të tyre, pa rifituar pronën, pa marrë njohjen dhe kujdesin që meritonin”, u shpreh ajo.

Sula kërkoi edhe njohjen ligjore të fëmijëve të lindur ose të rritur në internim, të cilët përjetuan të njëjtat privime dhe stigmë politike, megjithëse emrat e tyre mungonin në vendimet administrative.

“Mungesa e emrit në një dokument nuk e zhbën dëmin e pësuar. Njohja e tyre nuk është privilegj; është drejtësi e vonuar, dinjitet dhe përgjegjësi e shtetit”, theksoi Sula.

Ajo kërkoi që ndjesa e shtetit të dëshmohet me vepra: me njohje ligjore, mbështetje konkrete, kthim të të drejtave, kërkim për të zhdukurit dhe ruajtje të vendeve të kujtesës.

Turi Shenjues Përkujtimor “Peizazhe të Internimit” u organizua nga AIDSSH-ja në kuadër të 23 Gushtit – Ditës Evropiane të Përkujtimit të Viktimave të Regjimeve Totalitare.

Turi përshkoi disa nga vendet kryesore të internimit në Lushnjë, duke ndërthurur dokumentet arkivore, dëshmitë e të mbijetuarve dhe kujtesën e hapësirave ku familje të tëra jetuan nën apel, mbikëqyrje, punë të detyruar dhe privim të lirisë.

Harta e deritanishme e AIDSSH-së evidenton 16 fshatra dhe vendbanime të lidhura me internimin në këtë zonë. Sipas të dhënave të administruara, në to vuajtën mbi 500 familje, me rreth 2,100 persona të evidentuar.