Një avion ushtarak italian, Eurofighter, u rrëzua mbrëmjen e të martës në afërsi të aeroportit Trapani Birgi dhe hetuesit po punojnë për të përcaktuar shkaqet. Janë të shumta pistat që po ndiqen, nga një shpërthim në fluturim e deri tek fenomeni ëind shear, era e papritur që mund të përplasë një mjet fluturues në fazën e uljes, e deri tek një problem shëndetësor i papritur i pilotit. 33 vjecari Antonio Altruda, me origjinë nga Caserta, humbi jetën në aksident dhe hetuesit supozojnë se ai mund edhe të ketë qëndruar në drejtimin e avionit të tij ushtarak deri në momentin e fundit për të evituar përplasjen e tij me zonat e banuara.
Aeronautika ushtarake ka nisur tashmë hetimet bashkë me prokurorinë e Trapanit. Avioni i përfshirë në aksident fluturonte në formacion edhe me një tjetër eurofighter dhe po ktheheshin në bazë pas misionit rutinë të tyre, kur papritur kulla e kontrollit humbi kontaktet me pilotin.
Sipas të dhënave të para, nga avioni nuk është lëshuar asnjë alarm, madje as sinjali automatik i lëshimit të sediljes së pilotit që bën që të hyjë automatikisht në funksion Gps. Një kamera sigurie e një banese në zonë, ka mundur të fiksojë imazhet. Atje shihet qartësisht shpërthimi në ajër i avionit. Sidoqoftë vetëm kutia e zezë e avionit do të zbardhë dinamikën e incidentit.
