Aksidenti i ndodhur dje në Liqenin e Shkodrës, ku një hidroplan i Ministrisë së Punëve të Brendshme të Malit të Zi u rrëzua, u regjistrua nga disa turistë.
Disa pamje amatore të filmuara një ditë më parë në Liqenin e Shkodrës, tregojnë momentin kur hidroplani AT802A, i cili është në pronësi të njësisë helikoptere të Ministrisë së Punëve të Brendshme të Malit të Zi, u përmbys në rajonin e Liqenit të Shkodrës.
Piloti Branislav Stojanoviç po përpiqej që të mbushte cisternën me ujë, për të shuar zjarrin që kishte përfshirë malin Garac, të Malit të Zi. Agjencia e lajmeve “Vijesti” raporton se, piloti dështoi të zbarkonte në liqen për të mbushur rezervuarin me ujë, i cili do të përdorej për të fikur zjarrin.
Mediat malazeze bëjnë të ditur se, piloti shpëtoi duke pësuar vetëm disa lëndime të vogla trupore. Ministria e Punëve të Brendshme të Malit të Zi deklaroi se, shkaku i aksidentit dhe niveli i dëmtimit të aeroplanit do të përcaktohen gjatë hetimeve.
